Main result
Gugulu
Gugulu (òrere "Google" me usem Uket-chieen̄) ìre òkukup me owuwa ido. Ema ekirọ mbubek ifolek inyinyi ebiene intanet kire . Emọnọ ọmọ kire ge me lek ini ìmimiin̄ ichit, ọmọ mè Amazọn, Apulu mè Fesbuk.
Ebirieen̄ iba, "Larry Page" mè "Sergey Brin" egbaan̄ ichili Gugulu. Ema echili mbubek yi mgbọ ema ekikween̄ inu ibekana ofia-ikpa [Ph.D students] me Uga Uwuikpa "Stanford" me Kalifọnia. Ema ene iba cha egbaan̄ ikaan̄ akọp mè irek ini me efit (14%) me lek ikpa-okaan̄ [shares] me mbubek ya; mè iyaka ikaan̄ si akọp irek go mè gweregwen me efit (56%) me lek unye itọ-ikọ [voting power] inan̄a me lek ema ekaan̄be . Ema eketap erieen̄ Gugulu me ikpa mbubek ido [business registration] kire mbubek lek ene [privately owned] me Kalifọnia me òso usen ini me emen Onyan̄ ge me acha 1998. Me òso usen akọp iba mè iba me emen Akọp Onyan̄ me acha 2002, ema mîyaka isitap erieen̄ ya ofifi [reincorporate] me ama mkpulu ile "Delaware." Adasi mgbọ Gugulu osibe ijọn̄ ewe mbubek [Stock Market; IPO] ìre òso usen akọp mè onaan̄ge me emen Onyan̄ Jeeta, me acha 2004. Emen mgbọ ya si ke ema esibi ifo uwu-ibot [HQ] kiban̄ ekigwenbe "Googleplex" òkup me "Mountain View" me Kalifọna. Me emen Onyan̄ Jeeta me acha 2015, ema mînyi ulook ifolek otitọt kiban̄ ibeben otutuuk atagọọk mbubek kiban̄ itap me emen ìgba-mbubek [conglomerate] ekigwen "Alphabet Inc." Me ikeya, Gugulu ìnire ge me lek mbubek òkup me irak "Alphabet Inc" mè iyaka ire eyi òsisibi isi ichit me emen ìgba ya. Mgbọ keyi "Sundar Pichai" onire ogwu ibot mbubek [CEO] Gugulu me irek kè "Larry Page" ònikana ire ogwu ibot mbubek "Alphabet Inc."
Igọọk me lek ike ya osa igwat lek imin, ema mîsan̄a esese ayaya , mè ibọkọ esese mbubek ilep mè igbaan̄ irọ si mbubek melek ebi ife, echa onenirọ inyi mbubek kiban̄ iwele owot igak adasi eyi ema ekekirọ (òrere 'Google Search' — isasa Gugulu iweek inu me olik). Mgbọ keyi, ema mîki kire: echi òkekitap ubọk inyi ebiene erọ ikwaan̄ kiban̄ egwat lek mè eyaka erọ ekaan̄ ibot (Google Docs, Google Sheets mè Google Slides erọ eya), imen (Gmail orọ eya), isesin̄ mgbọ mè idọdọmọ mgbọ (Google Calendar), isesun̄ inu me ntọn̄ inyọn̄ inyi ene (Google Drive), idadia etip ugwat ugwat [instant messaging] mè itutumu ikọ isi-mè-isi me okpọk-etip [video chat] (Google Allo, Duo mè Hangout), ikakana usem ge itap me ofifi usem (Google Translate), ijejeen̄ ene ogugo-ijọn̄ mè oniin̄ ije (Google Maps, Waze, Google Earth, Street View), icheche
