De Agni (Sanskrit: अग्नि, Agni m.; Pali: Aggi) isch de Füürgott im Hinduismus, wo bsunders i de vedische Zitt vereert woren isch und im moderne Hinduismus fast kai Role me spilt.
Im Rigveda isch de Agni nebet em Indra di wichtigst Gotthait. E verkörperet s Füür, bsunders aber s Opferfüür und isch drum de Vermittler zwöschet de Mensche as Opferer und de Götter as Opfernemer. As Grihapati („Huusherr“) isch er ständige Gast bi de Mentsche und schützt die i de Form vom Herdfüür, wo as hailig gelt. I de Luft manifestiert sich de Agni as Blitz und im Himmel as Sunefüür. D Herkumpft vom Agni isch aber s Wasser, wege dem werd er Apam napat „Wasserenkel“ gnennt. De Name vo sinere Frau Svaha isch no hüt e verbraitete Opferruef, wo bim Füüropfer güsseret werd. De Agni werd mit zwee Chöpf und flammige Hoor dargstellt und het meriri Ärm, sis Riittier (vāhana) isch de Widder. Er isch de Welthüeter (lokapāla) vom Südooste.
- „Wiene wertvolls Ross
- mit Vereerig loobi di, Agni,
- du, wo öber ali Opfer waltisch!“ Rigveda I,27,2