E vu latiinisch Alemannia abglaititi Schribwiis isch in viile Sproche de Namme fer Dytschland. Fer witteri Bedütige vu Alemannia lueg under Alemannia.
D'Gliichsetzig vu Alemannia un Ditschland füehrt oft zue Verwexlige, wil mer in sällene Länder under Alemanne Dytschi verstoht un nit d'Sprecher vu ere ditsche Dialektgruppe.
Dass Alemannia als Bezeichnig fiers alemannisch Sprochgebiit wohl au in Ditschland nit grad gängig isch, dirft aber nit bloss an dr politische Ufdeilig vum alemannische Sprochgebiit in mehreri Länder un dr grosse Underschiid vu dr einzelne alemannische Dialekte liige. Dass mer nämlig au in beliebte Urlaubsländer wie Spanie oder dr Tirkei under Alemannia ebe Ditschland verstoht, dirft au e Näbeeffekt bi de ditsche Urlauber ha, wo mer nit underschätze sott: In dene baar Brocke Landessproch, wo sie läre mien, um sich mit dr Iheimische z'verständige, bezeichne si sich sozuesage als Alemanne. Es dät dorum nit verwundere, dass au in grosse Deile vu dr ditschsprochige Bevölkerig dr latinisiert Begriff Alemannia als synonym mit Ditschland agsähe wird. In dr Schwiz degege heisse die ditsche Dialekt Schwizerdütsch un alli Ditsche sin Schwobe. Die welsche Schwizer verstehn under Allemagne jo sowiso Ditschland. D. h. au dert dürft e menke mit Alemannisch als wisseschaftlich korrekti Bezeichnig fier Schwizerdütsch oder au mitem Begriff Alemannia nit viil afange chänne. Im Elsiss schliesslich wird wohl chum e Elsässer ebberem us Innerfrankriich ohni e langi Erchlärig sage chänne, s'Elsiss läg in ere Alemannia. So schribt die französisch Wikipedia am End vu 2005 iber d'Alemanne in de Vergangehait: Les Alamans ou Alémans étaient un ensemble de tribus germaniques.[1] Alémanique isch dert 2005 mit Alsacien glichgsetzt worre – es isch e Page de redirection.
Folgedi Wikipedias betitle z. B. ihr Artikel iber Ditschland mit eme vu Alemannia abgleitete Begriff, wie dr folged Uszug us dr Interwiki-Links vum ditsche Wikipedia-Bitrag iber Ditschland zeigt:
| Wikipedia | Dytschlandartikel |
| Arabisch | ألمانيا /ʔalma:nija/ |
| Aragonesisch | Alemaña |
| Aserbaidschanisch | Almaniya |
| Asturisch | Alemaña |
| Baskisch | Alemania |
| Französisch | Allemagne |
| Galicisch | Alemaña |
| Katalan | Alemanya |
| Kornisch | Almayn |
| Kurdisch | Almanya |
| Lingala | Alémani |
| Nahuatl | Alemantlan |
| Okzitanisch | Alemanha |
| Portugiesisch | Alemanha |
| Spanisch | Alemania |
| Tagalog | Alemanya |
| Türkisch | Almanya |