| Dialäkt: Baseldytsch |
Dr Bezirk Lieschtel isch e Verwaltigseinheit im Kanton Basel-Landschaft (Baselbiet) mit dr Hauptstadt Lieschtel, wo au Kantonshauptstadt isch.
Dr Bezirk Lieschtel liggt in dr Mitti vo de ybrige vier Bezirk vom Baselbiet und isch drumm zentral gläge. D Gmeinde vom Bezirk Lieschtel wärde normalerwyys no zem Oberbaselbiet grächnet (wie d Bezirk Waldeburg und Sissach). Dr Bezirk Lieschtel gränzt im Norde an Dytschland (Landkreis Lörrach, Bade-Wyrttebärg), im Nordoschte an Kanton Aargau (Bezirk Rhyfälde), im Oschte an Bezirk Sissech, im Süde an Bezirk Waldeburg, im Weschte an Kanton Soledurn (Bezirk Dorneck) und im Nordweschte an Bezirk Arlise. Är isch dodrmit nur mit em Bezirk Laufe nid verbunde. Dä hett aber no bis Aafang vo de 1990er Joor zum Kanton Bärn gheert.
Dr Bezirk Lieschtel isch noch Arlise dr noch Yywooner (56'388 Ändi 2006) zweitgröscht und zweitiflussriichscht Bezirk vom Kanton.
D Gemeinde vom Bezirk sin noch Lieschtel usgrichtet (Brattele und Augscht, wo mängisch au zu Unrächt zem Unterbaselbiet zellt wärde, au noch Basel). Lieschtel als Kantonshauptstadt isch au dr wichtigscht Ort im Bezirk. Lieschtel isch au flechemessig am greeschte. Am meischte Mensche wohne syt em Baubuum vo de 1970er Joor in Brattele, dr üsserschte Agglomerationsgmeind vo Basel. An 2. Stell kunnt denn Lieschtel.
Dr Bezirk isch seer unterschiidlig prägt: In Brattele und Augscht dominiere Industrie und Woonsiidlige, Lieschtel mit sinere Agglomeration (Fränkedef, Füllschdrf, Lause, Buebedorf, Sältisbärg) mit faschd 30'000 Iiwohner isch stedtisch prägt, in de andere Gmeinde herrscht e ländligs Bild vor.