Dr Bischof isch i vilne chrischtleche Chilene dr geischtlech Läiter vomene bestimte Gebiet, wo meischtens es baar, oder au ganz vil Chilegmeinde und Pfarreie drin sind.
D Amtsbezäichnig ”Bischof“ chunt vom alte griechische Wort ἐπίσκοπος (epískopos), wo uf düütsch ”Ufseher“ und ”Hüeter“ bedüütet. Im nöje Teschtamänt chunt s Wort zäme mid de beide andere Wörter πρεσβύτερος (Presbyter) und διάκονος (Diakon) vor, und die bezäichne die erschte Funkzioone, wo’s i de Gmeinde vo dr no junge chrischtleche Chile ggää het. Es isch es baar Joorhundert ggange, bis d Chileämter dr fescht Status gha hend und bis s Amt vom Bischof im Römische Ryych als einzige prieschterleche Verantwortleche vomene Bischtum etabliert gsi isch. Die ganzi Gruppe vo de Bischöf wird zämegnoo als ”Episkopat“ bezäichnet.
De Regioone, wo es baar Pfarreie drin zämegfasst sind, säit me Bischtum oder Diözeese – das chunt vom griechische διοίκησις (dioíkēsis), wo ”Verwaltigsbezirk“ bedüütet – und si sind ganz underschidlech gross. E Deil vo de erschte Diözese entspräche gnau em Gebiet vo de alte römische Provinze, und i dr Hauptstadt vo dene Sprängel isch dr Bischofssitz ygrichtet worde, so wie öpe s Zäntrum vom Bischtum vo dr Provinz Raetia Prima i dr Stadt Chur gsi isch, und das Chilegebiet het sech ohni Underbruch zum Bischtum Chur entwicklet. Anderi Diözeese sind im Verlauf vo dr Zyt neu ygsetzt worde, wo wie öpe s Bischtum Choschtez, wo erscht im früene Middelalter im Frankeryych für d Alemanne im Gebiet am Rhy und öschtlech vo dr Aare ggründet worden isch.
I dr Spootantike und im Middelalter het d Chile im Episkopat e Rangornig usepildet, wo d Ebene vo de Patriarche, de Metropolite, de Ärzbischöf und de Diözesanbischöf het.
Au in andere grosse chrischtleche Chilene känt me s Amt vom Bischof, also bi de orthodoxe, de alt-katholische, de anglikanische und bim ene Deil vo de refermierte Chrischte.
Dr Bischof vo Rom läitet als Oberhaupt vom Episkopat di ganzi römisch-katoleschi Chile.