Dr Charles André Joseph Marie de Gaulle (* 22. Novämber 1890 z Lille, Nord; † 9. Novämber 1970 z Colombey-les-Deux-Églises, Haute-Marne) isch e franzöösische General und Staatsmaa gsi. Im Zwäite Wältchrieg isch er dr Füerer vom Freie Frankriich gsi, wo gege die dütschi Bsatzig kämpft het. Denn isch er vo 1944 bis 1946 dr Schef vo dr Brovisorische Regierig vo dr Franzöösische Republik gsi. Wäärend em Algeriechrieg het er 1958 e Regierig bildet und e Verfassigsreform duuregsetzt, und eso die Fümfti Republik gründet. Vom Januar 1959 bis April 1969 isch er Bresidänt gsi, het zämme mit em dütsche Bundeskanzler Konrad Adenauer dr Grundstäi für die dütsch-franzöösischi Versöönig und für d Entwigglig vo dr Öiropäische Wirtschaftsgmäinschaft gläit, Frankriich en unabhängigi nukleari Macht (force de frappe) verschafft und Algerie d Unabhängikäit gee. Die politischi Ideologii vom Gaullismus, wo uf iin zruggoot, het bis hüte Iifluss uf die franzöösischi Politik.