Z Frankriich si d codes INSEE numerischi oder alphanumerischi Code, wo vom nationalen Institut für Statistik und Wirtschaftsstudie (frz.: Institut National de la Statistique et des Études Économiques, ere öffentlige Institution, wo für d Erfassig und Analyse vo verschidnige statistische Aagoobe zueständig isch) vergee wärde. Si umfasse Iiwohner, Gmeinschafte und Undernähme.
Dr offizielli geographischi Code isch e Nomenklatur vo de französische Gmeinde, wo vom INSEE definiert wird und wo em dütsche amtlige Gmeindischlüssel entspricht und wie dä hierarchisch ufbaut isch. Dä Code bestoht us fümf Ziffere, wo die erste beide drvo d Ornigszahl vom Département si und die letzte drei die alphabetischi Position vom Ort in däm Département aagää.
Bischbil:
Metz het dr INSEE-Code 57463
Dä setzt sich zsämme us 57 (dr Ornigszahl vom Département Moselle) und 463 (dr Position vo dr Stadt in dr alphabetische Ortsliste vo däm Département).
Au die französische Überseegebiet si dur d INSEE-Code abdeckt, sogar sälli, wo nid in Gmeinde undergliideret wärde.[1]
Z Frankriich wird jedere Person bi ihrer Geburt e 15-stelligi Nummere zuegwiise, wo Sozialversicherigsnummere heisst und dur d Erfassigsnummere vom nationale Identifikations-Verzeichnis vo de Persone (NIR) bestimmt isch.