D Internazionaale isch s Kampflied vo dr sozialistische Arbäiterbeweegig, wo uf dr Wält am witiste verbräitet isch. D Arbäiterbeweegig isch ideologisch – noch em marxistische Motto „Proletarier vo alle Länder, veräinigt öich!“ – em proletarische Internazionalismus verpflichtet. Dr ursprünglig französisch Teggst us em Joor 1871 stammt vom Eugène Pottier, eme Dichder und aktive Mitgliid vo dr Bariiser Kommune, em revoluzionääre Bariiser Stadtroot wääred em Dütsch-Franzöösische Chrieg, wo sich spontaan bildet het. D Melodii vom Lied het 1888 dr Belgier Pierre Degeyter komponiert.