Dr Drei-Schluchte-Staudamm (chin. 三峽大壩 / 三峡大坝, Sānxiá Dàbà) isch e Stauaalaag mit eme Wasserchraftwärk und ere Schiffsschlöisenaalaag im Jangtsekiang z China. Er lit im Ort Sandouping öbbe 40 km flussuf vo Yichang in dr Brovinz Hubei. S Wasserchraftwärk het en installierti Generator-Läistig vo 18,2 Gigawatt und isch s grösste uf dr Wält, aber es git hööcheri und lengeri Staudämm und gröösseri Stausee. Dr Stausee goot dur die berüemte Drei Schluchte mee as 600 km bis uf Chongqing. S Brojekt wird vo dr China Three Gorges Corporation betriibe.
Vièr Gründ füür dr Bau vo däm Megaprojekt het me agfièrt: Stroomerzügig für d’Megacitys an dr Oschtküschte vo China, a gueti wirtschaftlichi Entwigglig au in Zentralchina, d’Verbesserig vo dr Schiffaart vo Schanghai über Wuhan bis Chongqing, und e besserè Hochwasserschutz am Middl- und Unterlauf vom Yangtse. D’Gegner vom Projäggt händ e schwärwiègende Ygriff in d’Ökologi und negativi sozio-kulturelli Folge befürchted, denn mehr als 1,4 Millione Lüt sind umgsidlet worde, und fruchtbari Talflächene, aber au vili kulturelli Relikt sind dur d’Yberfluetig verloore gange.