Dr Expressionismus isch e Beweegig und en Epoche in dr Kunst vo dr Modärne. Er het z Dütschland am Aafang vom 20. Joorhundert in dr Moolerei und Lürik aagfange. Si Kennzäiche isch s, ass dr Künstler d Wält us ere subjektive Perspektive daarstellt und sä vilmol verzerrt, zum si Gmüetszuestand und sini Ideä z vermiddle, das häisst d Bedütig isch em wichdiger gsi as die füsischi Wirkligkäit.
Dr Expressionismus wird aagluegt as e Reakzioon uf s positiwistische Dängge, wo s Transzendänte usgschlosse het, und, diräkter, uf anderi Kunststiil wie dr Realismus, dr Naturalismus und dr Impressionismus.
Dr Expressionismus isch as en avant-garde Stiil vor em Erste Wältchrieg entwigglet worde und isch wääred dr Weimarer Republik populär bliibe, vor allem in Berlin. Dr Stiil isch in vile Kunstforme verbräitet gsi: in dr Archidektur, Bildende Kunst, Litratuur, Theater, Danz, Film und in dr Muusig.
Dr Begriff wird vilmol mit Angst und Bedrückig assoziiert und dorum mänggisch über d Epoche vom Expressionismus im 20. Joorhundert uuse allgemäin aagwändet. In dere Beziejig reedet mä mänggisch au vo Mooler wie vom Matthias Grünewald oder vom El Greco as Expressioniste