Als Februarumsturz, glägentlich au als Februarputsch, bezeichnet mä d Machtübernahm in de Tschechoslowakei dur die Kommunistischi Partai vo de Tschechoslowakei (KSČ) im Februar 1948. Im Sprachgebruch vo de KSČ hät die Übernahm offiziell Siigriiche Februar (Vítězný únor) khaisse.
Um Neuwahle z erzwinge, sind am 20. Februar 1948 zwölf nitkommunistischi Mitgliider vo der Regierig us Protest gäge d Absetzig vo acht nitkommunistische Prager Bezirkspolizeichefs dur de kommunistischi Inneminister Václav Nosek zruckträte. Der Staatspräsident Edvard Beneš isch vom Klement Gottwald unter Druck gsetzt worde, kei Neuwahle azsetze und stattdesse e neui, kommunistisch dominierti Regierig z vereidige. Um in unter Druck zu setze händ d Kommuniste Massedemonstratione und Streiks organisiert und händ mit em Imarsch vo de Rote Amree droht. De Usseminister Jan Masaryk, de Sohn vom Gründigsvater Tomáš Garrigue Masaryk, hät am 10. März bim sogenannte dritte Prager Fenstersturz tödlichi Verletzige erlitte.