|
Dä Artikel behandlet dr Friiburger Greis um dr Adolf Lampe. Für anderi Friiburger Greis im Nationalsozialismus lueg do |
S Friiburger Konzil, au Friiburger Greis, isch e Greis vu Akademiker un Bfarrer gsii, wu sich z Friiburg im Briisgaü geischtig vum Nationalsozialismus abgsetzt hän.
S Friiburger Konzil isch no dr Krischtallnacht vu grischtlige Friiburger Nationalekonome un Hischtoriker ins Läbe gruefe wore. S Ziil isch gsii, "sich iber d Megligkeite un Pflichte vu Chrischte zum Widerstand glar z wäre."[1] S erscht Dräffe vu däm Greis isch in dr Wohnig vum Adolf Lampe gsii - dr Initiator un dr Virschidriiber. Speter het mer sich reihum droffe; Iiladige hets numme vu Müül zu Müül gä - mer het vermiide, Spüüre z hinterlo. Diä Sitzige sin meischtens mit eme Referat iigleitet wore, wu drno driber diskutiärt wore isch. S isch aber aü um Dagesfroge gange.
Am Afang isch dä Greis rein broteschtantisch gsii; speter het mer aü Katholike iiglade. Do isch drno iber Froge vum Natürrächt üs katholischer un evangelischer Sicht un iber d chrischtlig Ethik gredet wore.
Aber fir alli Teilnämmer, so schribt d Chistine Blumenberg-Lampe, seig d wichtigscht Frog diä noch em Rächt vu dr Chrischte zum Widerstand un s Broblem vum Tyrannemord gsii. "S isch arg un d Frog grunge wore, ebs nit Chrischtepflicht seig, uffe gege s Terrorregime ufzstoh un z versueche, s Volk wachzschittle, ohni Angscht vor dr Terrormethode vu dr Gestapo. Vu däm Gedänke isch mer aber abkumme, wel e Martyrium, wus villicht drzue kumme wär, sinnlos erschiine isch, wel im Volk küüm bekannt wore wär."[2]