Für e Begriff freije Wille oder Willensfreihäit git s kä Definizion, wo allgemäin anerkennt isch. In dr Umgangssprooch verstoot mä öbbis anders under em freije Wille as im juristische oder psüchologische Sproochgebruuch. In dr Filosofii wird dr Begriff nit äihäitlig definiert.
In eme fachübergriifende Sinn ghöört zur Willensfreihäit die subjektiv empfundeni menschligi Fähigkäit, ass mä, wenn s verschiideni Möögligkäite git zum Weele, e bewussti Entschäidig cha mache.
In dr Filosofii basiert d Idee vom Mensch as „Subjekt“, wo „autonom“ oder au „moralisch“ isch, druf, ass er e freije Wille het. Au die politische Ideä vo dr „Freihäit“ und vo dr „Demokratii“ setze die Aanaam vorus.
Aber scho sit em griechische Altertum, und bsundrigs sit em Aafang vo dr Ufkläärig, wird d Vorstellig vom ene freije Wille immer wider bezwiiflet.