D Frucht (vo latiin. fructus) von ere Pflanze isch d Blüete wo dr Soome rif worde isch.
D Frucht bestoot us alle Organ, wo von ere Blüete chömme, und wo d Soome umschliesse bis dass si rif si. Brinzipiell bilde nume die Pflanze Frücht, wo e zuenige Fruchtchnoote häi (Bedecktsoomer = Angiosperme); bi de Nacktsoomer (Gümnosperme, z. B. Noodelböim oder Ginkgo-Böim) entstöön nume freiji Soome.
E Frucht cha usser us em Fruchtblatt au no us deene Organ bestoo: Aggsegwääb (zum Bischbil dr Blüetebode), Blüetehülli, Spelz. Pflanze mache Frücht zum sich usbräite: Dier frässe d Frücht und schäide denn d Soome mit em Gaggi wit äwägg vo dr Mueterpflanze us. Je nochdäm, öb d Soome vo dr Frucht iigschlosse oder im rife Zuestand freigsetzt wärde, underschäidet mä zwüsche Schliess- und Öffnigs- bzw. Ströifrücht.
Im allgemäine Sproochgebruuch wird under Frücht au Obst verstande und d Lüt mache mäistens kä Underschiid zwüsche de Soome und dr Frucht.