Dr Gottfried-Keller-Bryys (dt. Gottfried-Keller-Preis) isch e schwyzerische Literaturbryys, wu vu dr Martin-Bodmer-Stiftig anne 1921 zum 102. Gebuurtsdaag vum Gottfried Keller gstiftet wooren isch. Är wird in dr Reegle alli drei Johr vergee un isch mit 25.000 Fr. dotiert (Stand 2016). Uuszaichnet wääre Schriftsteller*ne us dr Schwyz fir ainzelni Wäärch oder s Gsamtwäärch, Hauptkriterium isch dooderby di literaarisch Qualideet. Au Schrifsteller*ne us andere Natione chenne uuszaichnet wääre, wänn iri Aarbet in dr Schwyz entstande isch oder e Bezuug zue dr Schwyz het. D Stiftig git derzue au Ehregoobe an verdienti Schriftsteller*ne un literarischi Ibersetzer*ne.