De Hanuman (Sanskrit: हनुमान, Hanumān m.) isch im Hinduismus e göttliche Aff und de troi Tiener vom Rama.
De Hanuman isch de Soo vom Windgott Vayu und vo de Nymphe Anjana. As Birooter vom Affekönig Sugriva werd er e Bundesgnoss vom Rama und werd denn sin troiste Tiener, wo im End d Sita rettet. Er werd as Aff mit menschliche Züüg dargstellt. Er isch muskulös und sini Huttfaarb isch hüffig goldig oder orangsch. D Langure (Semnopithecus sp.) weret z Indie as Hanumanaffe bizaichnet.
De Hanuman het gwaltigi Chräft. So isch er i aim Sprung vo Indie uf d Insle Lanka ggumpet. Woner het söle vom Himalaya Hailpflanze bringe, het er vergesse weli er söll pflücke und het drum de ganzi Berg uusgrisse, und ase ali Hailpflanze vo dem Berg zum Rama broocht. Er cha aber au dör d Wulche flüüge. Won em d Aahaänger vom Ravana, em Genger vom Rama, de Schwanz aazunde hend, het er die Glegehait gnutzt und mit sim brenige Schwanz di ganzi Stadt vom Ravana aazunde.