D Immunologii oder Immuunbiologii isch d Leer vo de bioloogische und biochemische Grundlaage vo dr körperlige Abweer vo Chrankhäitserreeger wie Bakterie, Wiire und Bilz und andere körperfremde Stoff wie zum Bispil bioloogische Toxiin und Umwältgift, und drüber uuse vo Stöörige und Feelfunkzioone vo deene Abweermechanisme. Si isch e Däildiszipliin vo dr Biologii. Iire Forschigsgeegestand isch s Immuunsüsteem, e Süsteem vo zellulääre und molekulaare Brozäss, wo s Erkenne und d Inaktiwierig vo Chrankhäitserreeger und körperfremde Substanze usfüere. Die Brozäss wärde under em Begriff Immuunantwort zsämmegfasst. Wäge dr zentraale Rolle vom menschligen Immuunsüsteem bi bi e Hufe Chrankhäite isch d Immunologii in dr Mediziin für s Verständnis, d Brevenzioon, d Diagnostik und d Therapii vo Chrankhäite vo groosser Bedütig.
Es git verschiideni Däilgebiet vo dr Immunologii. D Immuunchemii undersuecht d Strukduur vo Antigeen, Antikörper und die chemische Grundlaage vo de Immuunreakzioone. D Immuungenetik undersuecht die geneetischi Wariabilidäät vo Immuunreakzioone, bzw. d Mechanisme zur Erzüügig vo Antikörper, T-Zäll-Rezeptoore und de Komplex, wo Antigeen bresentiere. D Immuunpathologii und die kliinischi Immunologii undersueche Stöörige vom Immuunsüstaem, wo zum Bispil im Fall vo Allergie, bi dr Bildig vo Tumoor und bi Autoimmunchrankhäite ufdräte.