Karthago (latiin. Carthago, altgriech. Καρχηδών Karchēdōn; us em Fönizische qrt-hdšt Qart-Hadašt ,nöiji Stadt‘) isch e Groossstadt in Nordafrika gsi in dr Nööchi vom hütige Tunis z Tunesi. In dr Antike isch Karthago d Hauptstadt vo dr See- und Handelsmacht Karthago gsi. D Römer häi d Iiwooner vo Karthago as Punier (abgläitet vo Fönizier) bezäichnet. Im dritte und zwäite Joorhundert vor dr Zitewändi häi Rom und Karthago um d Vorherrschaft im westlige Middelmeerruum kämpft. Noch em Siig vo Rom 146 v. d. Z. und dr Zerstöörig vo Karthago isch s karthagische Riich Däil vo römische Imperium worde. Under em Cäsar isch Karthago nöi gründet worde und und isch glii wider e bedütendi Groossstadt gsi. Erst mit em Ändi vo dr Antike het au dr Ort si Bedütig verloore.
Hüte isch Karthago (franzöösisch Carthage, arabisch قرطاج Qartādsch, DMG Qarṭāǧ) e Vorort vo Tunis. S archeologische Usgraabigsgländ vo Karthago isch e turistischi Attrakzioon und isch 1979 in d Liste vom Wältkultuurerb ufgnoo worde.