Kommunikazioon (lat. communicatio, ‚Mitdäilig‘) isch dr Usdusch oder s Überdrääge vo Informazioone. „Informazioon“ isch in däm Zämmehang e zämmefassendi Bezäichnig für Wüsse, Erkenntnis oder Erfaarig. Mit „Usdusch“ isch e gegesitigs Gee und Nee gmäint; „Überdrääge“ isch d Beschriibig drfür, ass drbii Distanze chönne überwunde wärde, oder es isch e Vorstellig gmäint, ass Gedanke, Vorstellige, Mäinige und anders vo äim Individuum zum en anders fliesse. Das isch e bestimmti Sichtwiis und metaforischi Beschriibig für en Alldaag – wemm mä s Fenomeen Kommunikazioon genauer will beschriibe, wird s immer schwiiriger, e son e Metafere z bruuche.
S Wort „Kommunikazioon“ wird usser in dr ursprünglige Bedütig vo Sozialhandlig au für anderi Vorgäng in underschidlige Zämmehäng verwändet. D Kommunikatioonstechnologie wärde immer mee aagwändet und esoisch s zum Bischbil drzue choo, ass au technischi Aspäkt Däil vom Kommunikazioonbegriff worde si. Under Kommunikazioon wärde also au s „Überdrääge vo Signal“, „wäggselsitigi Stüürig“ und in äifache Fäll au „Verbindig“ vo Gräät verstande; in andere Situazione wird Kommunikazioon uf Instiduzioone oder Undernääme und dene iiri Ziilgrubbe bezoge. Denn wärde nüm Lääbewääse, sondern organisierti Äihäite (oder „Süsteem“) as Kommunikatore (Broduzänte und Rezipiänte) aagluegt, zum Bischbil wenn im Zämmehang mit Schurnalismus, Publizistik oder Marketing vo Kommunikazioon d Reed isch.
Kommunikazioon isch alldääglig und s gseet us, wie wenn si eso sälbstverständlig isch, ass mä käini Brobleem drmit cha gsee. Für die mäiste Situazione längt das; es wer z kompliziert, wemm mä die äigeni Kommunikazioon ständig wurd hinderfrooge. Erst bi Missverständniss und Misserfolg, wo mit Kommunikazioon chönne in e Zämmehang brocht wärde, wird d Kommunikazioon zum Brobleem. In dr wüsseschaftlige Behandlig vo dr Kommunikazioon wird d Froog gstellt, wie Kommunikazioon cha erkläärt wärde; under was für Bedingige si ablauft; was d Kriterie si dass si erfolgriich isch; und wie mä Modäll cha mache, wo mä mit ene Vorussaage cha abkäite und wie mä sött handle.