Dr Koreachrieg isch en Chrieg zwische Nordkorea und Südkorea gsii, wo von de Grossmächt China reschpektive USA unterschtützt worde sii. Er het von 1950 bis 1953 duuret.
S ungeteilte Land Korea isch vor 1945 Jahrzehnti lang vo Japan bsetzt gsii. Nach dr Weltchriegs-Niderlag vo Japan isch dr Norde vo Korea vo dr Sowjetunion bsetzt worde und dr Süde vo de USA. Es händ au nach Abzug vo de Bsatzigsmächt starki Spannige beschtande uufgrund vo de verschidene ideologische Syschtem Kommunismus und demokratische Kapitalismus in de beide Landesteile.
1950 het Nordkorea Südkorea militärisch angriffe. Es het schnäll Gländegwinne erziilt, wo bis zur Hauptschtadt vom Süde, Seoul, greicht händ. Denn het dr Sicherheitsrat von dr UNO, wo in Abweseheit vom russische Vertreter taget het, Nordkorea als Angriffer verurteilt und en multinationali Armee unter UNO-Flagge und amerikanischer Füehrig zur Rückschlagig von dere Aggression ("repell this armed attack") angregt. Die Schtriitmacht isch denn auch zschtand choo, het zum Gegeschlag uusgholt und die nordkoreanische Truppe bis fascht an die chinesischi Grenze uufe zrückdrängt. Das widerum het dr Chriegsiitritt vo China zur Folg ghaa, wo siinersiits die vorab us US-Amerikaner zämmegsetzte UNO-Truppe wider bis in d Mitte vom Land zrückdrängt het. Dört het's en Waffeschtillschtand gää und in dr Region vo Panmunjom am 38. Breitegrad en Demarkationslinie, wo d Truppe vo de beide Länder trennt und bis hüüt en provisorischi Grenze zwische Nord- und Südkorea bildet.