D Lady Gaga (* 28. März 1986 z New York City; birgerlig Stefani Joanne Angelina Germanotta) isch e US-amerikanischi Popsängeri un Songschryyberi.
Ihri erschten Ufdritt het si in dr Rockszene vu dr New Yorker Lower East Side gha. Bal het si ne Verdrag bi Streamline Records unterzeichnet, ere aagschlossene Plattefirma vu Interscope Records, wu anne 2007 grindet woren isch. Dert het si am Aafang fir verschideni andri Interscope-Musiker kompeniert wie d Pussycat Dolls un het dodermit d Ufmerksamkeit vum Akon gweckt, wu ihri stimmlige Fähigkeite gmerkt gha un si bi syym eigene Label Kon Live Distribution unter Verdrag gnuu het.
Ihre Debütalbum The Fame isch am 19. Augschte 2008 vereffentligt wore. S het positivi Rezensione iberchuu un isch uf Platz 1 chuu unter anderem z Kanada, z Eschtryych, z Dytschland un z Irland. Ihri erschte bode Singles Just Dance un Poker Face, wu vum RedOne co-produziert wore sin, sin wältwyti Nummer-eis-Hits wore. S Album het segs Grammy-Nominierige iberchuu un isch as beschts Electronic-/Dance-Album un as beschti Dance-Ufnahme uuszeichnet wore. Aafangs 2009 isch si im Vorprogramm vu dr New Kids on the Block un vu dr Pussycat Dolls ufdrätte un het ihri erscht Solotournee The Fame Ball Tour gmacht. Im Novämber 2009 isch ihre zweit Album The Fame Monster erschine, wu in e Deil Länder as Nejuflag vu ihrem Debütalbum erschine isch. Derzue het si ihri zwot Tournee The Monster Ball Tour aagfange.
D Lady Gaga losst sich vu Glam-Rock-Musiker ischpiriere wie em David Bowie un Queen, un vu Popmusiker wie Madonna un Michael Jackson. Si nännt au Modi as Ischpirationsquälle fir ihri Lieder un Ufdritt. Ihre Name het si glent us em Song Radio Ga Ga vu Queen, wu vum Roger Taylor gschribe.[1]
- ↑ Archivierte Kopie. Archiviert vom Original am 10. März 2009; abgruefen am 28. November 2018.