| Dialäkt: Baseldütsch |
Die Langen Erle isch en Ebeni mit eme Uferwald em Fluss Wiise nooch in dr Nordwestschwiiz. Vom Basler Hirzbrunne-Quardier goht si über d Stadtgränze use bis uf Rieche an dr dütsch-schwiizerische Gränze. Es isch e bedütends Erholigsgebiet und het si Name übercho, bevor d Wiise kanalisiert worden isch und Erle as typischs Uferghölz am Flussufer gwachse si. No hüt het s in däm Gebiet 180 Hektare Wald.
Die Langen Erle wärden intensiv vo Spaziergänger, Jogger, Walker, Inline-Skater und Velofahrer bruucht. Usserdäm befindet sich uf dr Ebeni dr Dierpark Langi Erle. Drnäbe git s Familiegärte und Sportaalage.
D Förderig vo Grundwasser, wo in die stedtisch Drinkwasserversorg iigspiisst wird, isch aber die wichdigsti Nutzig. Öbbe d Helfti vom Basler Drinkwasser wird in dr Wiise-Ebeni broduziert. Zum z verhindere, ass sich dr Grundwasserpegel z fest absänggt, loot mä in bewaldete Wässerstelle Rhiiwasser lo versickere. Öbbe 60'000 m³ Rhiiwasser am Dag wärde dur ufwändigi Sandfiltration vo ihre Schwäbstoff befreit und denn in elf Wässerstelle, wo zsämme e Flechi vo öbbe 13 Hektare hai, verdeilt. Wie s dur e Bode fliesst, wird s Wassers wider suuber und cha denn as iiwandfreis Drinkwasser us mehrere Brünne bumpt wärde.
Bis ins spoote Mittelalter het d Wiise kei eiheitligs Flussbett gha, sondern verschiidnigi Wasserläuf, wo immer wider ihri Bett gänderet hai, si in Rhii gflosse. Im Lauf vo de letzte 200 Johr isch d Wiise luggelos verbaut und begradigt worde, zum Land z gwünne und sich vor Hochwasser z schütze. Hüte fliesst dr Fluss dur d Ebeni as e monotone Kanal mit vile Schwelle und het nume no wenig Kontakt zu siner ehemolige Aulandschaft. Hützudag foot mä wider aa, d Verbauige stückwiis ufzrisse und d Wiise z revitalisiere. Drmit hofft mä, d Artevilfalt vo de Pflanze und Dier und d Attraktivität für e Mensch und d Wasserbewohner z vergrössere.
-
D Wiise bachuf -
D Wiise bachab - Blick in dr Richdig vo dr Mündig in Rhii -
D Wiise bachab - die alti Iisebaanbrugg
