Under Logik (vo altgriechisch λογική τέχνη logiké téchnē „dänkendi Kunst“, „Vorgeenswiis“) verstoot mä d Leer vom vernümftige Schlüss zie. In dr Logik wird d Struktur vo Argumänt undersuecht zum gsee öb si gültig siige, unabhängig vom Inhalt vo de Ussaage. In däm Sinn reedet mä au vo „formaler“ Logik. Dradizionell isch d Logik e Däil vo dr Filosofii. Ursprünglig hät sich die dradizionelli Logik in dr Noochberschaft vo dr Rhetorik entwigglet. Sit em 20. Joorhundert verstot mä under Logik vor allem die sümbolischi Logik, wo au as grundleegendi Struktuurwüsseschaft behandlet wird, z. B. in dr Mathematik und dr Theoretische Informatik.
Die modärni sümbolischi Logik brucht anstatt vo dr natürlige Sprooch e künstligi Sprooch. E Satz wie Dr Öpfel isch root wird z. B. in dr Predikaatelogik as f(a) formalisiert, wo a für Dr Öpfel und f für isch root stoot. Si wändet genau definierti Schlussreegle aa. En äifachs Bischbil für son e formals Süsteem isch d Ussaagelogik, wo sogenannti atomare Ussaagen dur Buechstaabe ersetzt wärde. Dr symbolische Logik säit mä au mathematischi Logik oder formali Logik im ängere Sinn.