| Michael III. (Byzanz) | |
|---|---|
| Kaiser vom Byzantinische Riich | |
 | |
| Regierigsziit | 842–867 |
| Name | Michael III. |
| Uf d Wält cho | 19. Januar 840 |
| Gstorbe | 23. oder 24. Septämber 867 (im Alter vo 27) |
| Dodesort | Konstantinopel |
| Begrabe | Chille vo de Häilige Apostel, Konstantinopel |
| Vorgänger | Theophilos |
| Nochfolger | Basileios I. |
| Verhürotet mit | Eudokia Ingerina |
Dr Michael III. (middelgriech. Μιχαήλ Γ', gnennt Methystes Μεθυστής oder Methysos Μέθυσος ‚Süfer‘; * 19. Januar 839 z Konstantinopel; † 23. oder 24. Septämber 867 z Konstantinopel) isch e Soon vom Theophilos und Änkel vom Michael II gsi. Er isch 842 noch em Dood vo sim Vater byzantinische Kaiser worde, won er nume drei Joor alt gsi isch.
Solang er minderjöörig gsi isch, het si Mueter Theodora s Riich as Regäntin regiert. Si het d Gränze gege d Araber chönne verdäidige, au wenn iiri Generääl meereri Niiderlaage häi müesse iistecke. Si het e ikonoduli (bilderfründligi) Religionsbolitik bedriibe und scho in iirem erste Joor d Bildervereerig wider erlaubt. Si het au die bilderfindlige Paulikianer verfolgt und massakriert. Um d Erzieig vo iirem Soon Michael het si sich nid fest kümmeret und dä isch under en Iifluss vo sim Unggle Bardas groote, und wäge däm het er 856 si Mueter in e Chloster gsteckt. 857 het dr Michael d Macht sälber ergriffe. Er isch dr letscht Kaiser vo dr amorische Dünastii gsi.
Dr Bardas het dr Photios zum Patriarch vo Konstantinopel ernennt und Reforme voraabrocht, wäärend dr Michael sälber bi de Fäldzüüg mitgmacht het. Im Komflikt mit de Araber am Öifrat (856-863) het dr Kaiser 860 e Niiderlaag müesse iistecke, dr groossartig Siig vo sim Unggle bi Petronas in Chäiasie über en Emir vo Melitene 863 het die Schlappe wider guetgmacht. 861 si dr Michael und dr Bardas in Bulgarie iigfalle und dr Köönig Boris I. het sich zum Christedum bekeert. Dr Michael III. isch si Götti worde und dr Boris I. het dr Daufnaame Michael aagnoo.
Vom Meer us häi kretischi Piraate d Küste vom Riich aagriffe und verwüestet. Uf Sizilie si d Eroobrige vo de Araber witergange. 860 häi d Kiewer Rus dr Bosporus in Gfoor brocht, iire Raubzuug het aber chönne abgweert wärde.
867 isch dr Michael vo sim Günstling Basileios ermordet worde.
Dr Komflikt mit dr Katholische Chille under em Babst Nikolaus I. isch under em Michael III. verscherft worde, wo dr Kyrill und dr Method vo Saloniki aagfange häi, bi de Slaawe z missioniere.