Mikroorganismus

Mikroorganisme (Chliinstlääbewääse, in dr Umgangssprooch. „Mikrobe“) si mikroskopisch chliini Lääbewääse (Organisme), wo mä as Äinzelwäse mit em blutten Aug mäistens gar nid cha gsee. Bi de Mikroorganisme handlet es sich vor allem um Äizäller, aber es git au Meerzäller, wo chli gnueg si, zum drzue z ghööre. Mä däilt sä in verschidnigi Gröössenornige ii.

E Däil vo de Mikroorganisme si für d Ernäärig vo Bedütig, anderi chönne Infekzionschrankhäite uslööse.

Bischbil für Mikroorganisme si Bakterie, wie Milchsüüribakterie, vili Bilz, wie Heefi zum Bache, mikroskopischi Alge, wie Chlorelle, wo mänggisch as Naarigsergänzigsmiddel verwändet wärde, und Protozoe, wie Bantoffeldierli und dr Malaria-Erreger Plasmodium.

Öb d Wire Mikroorganisme si, hängt drvo ab, wie mä dr Begriff „Lääbewääse“ definiert. Wire häi kä Stoffwäggsel, und mä cha sä dorum nume as Organisme aaluege, wenn dr Stoffwäggsel nit Däil vo dr Definizion vo Lääbewääse isch.

D Wüsseschaft und d Leer vo de Mikroorganisme isch d Mikrobiologii.