Mit Mitkaiser bezäichnet mä dr Droonfolger vom Kaiser im Römische und im Byzantinische Riich, wo dä no zu sine Läbzite uuseglääse und uf e Droon erhoobe het.
S Prinzipat isch de facto e Monarchii gsi, de iure aber e Republik bliibe. S Amt vom Kaiser isch nie erblig worde und au im Spootmiddelalter het dr Noochfolger no zu Läbzite vo sim Vorgänger müesse däm si Mitkaiser wärde, für dass d Droonfolg wenigstens äinigermasse gsicheret gsi isch. Die Braxis isch im Byzantinische Riich witergfüert worde.
Öbbe sit de Flavier isch im Droonfolger dr Ditel Caesar gee worde, mänggisch zämme mit em Eereditel Princeps Iuventutis, Brinz vo dr Jugend. Dr Ditel isch vor em Naame choo. Wo dr Kaiser Nerva dr Marcus Ulpius Traianus zum Mitkaiser gmacht het, het er vo denn aa Caesar Nerva Traianus ghäisse bis er as Imperator Caesar Nerva Traianus Augustus sälber Kaiser worden isch.