Nomenklatur (vo lat. nomenclatura= Nameverzäichnis[1][2]) bezäichnet in dr Biologii d Disziplin vo dr wüsseschaftlige Benennig vo Lääbewääse. Si isch d Grundlag für d Wüsseschaft zum sich internazional über Organisme chönne verständige. D Regle vo dr Nomenklatur lege nume d Benennig fest. D Definizion und d Abgränzig vo de süstematische Äihäite sälber (Taxonomii) und vo iirer Hierarchii und Verwandtschaft (Süstematik) si drvo unabhängig. Wäge iirer Bedütig git s für d Nomenklatur strängi Regelwärk, sogenannti Codes. Für jedi vo de verschidnige Grubbe vo Organisme (Pflanze, Bilz, Alge, Dier, Bakterie, Wiire) existiert en äignigs Nomenklatur-Regelwärk, wo vo de andere unabhängig isch.