Odyssee

D Odyssee (altgriech. : ἡ Ὀδύσσεια - hē Odýsseia) isch näbe dr Ilias s zwäite Epos, wo im griechische Dichder Homer zuegschriibe wird. Si ghöört zu de eltisten und iiflussriichste Dichdige vo dr oobedländische Litratuur. S Wärk isch zum erste Mol im 8. Joorhundert v. d. Z. ufgschriibe worde. Es schilderet d Abentüür vom König Odysseus vo Ithaka und sine Gfäärte uf em Häimwääg us em Trojanische Chrieg.

D Odyssee bestoot us 12'200 Värs in Hexameter in 24 Gsäng. S verzelt wie dr Köönig vo dr chliine Insle Ithaka noch zää Joor Chrieg no zää Joor vo de Götter dra ghinderet wird, häimzfaare. Noch e Hufe Abentüür chunnt er schliesslig as Bättler zrugg und niemer usser sim Hund kennt en. In sim Huus het s e Hufe Fremdi, wo brobiere, sinere Frau Penelope iizreede, ass är, dr Odysseus, dood sig, und si wäi zwinge, äine vo iine z hüroote. Noch eme Wettkampf mit Pfiil und Booge döödet dr Odysseus zämme mit sim Soon Telemachos alli Fremde und au die Diener, wo nid dröi gsi si. D Penelope kennt in schliesslig wider un denn goot dr Odysseus zu sim alte Vater Laërtes uf Bsuech.

In vile Sprooche isch dr Begriff „Odyssee“ zum Sünonüüm für e langi Irrfaart worde.

De Albert Meyer het anne 1960 e Übersetzig vo der Odysse uf Bärndütsch uusegää.