Die Olympische Spiil (vo altgriechisch τά Ὀλύμπια ta Olýmpia „die Olympische Spiil“[1]; noigriech. olymbiakí agónes ολυμπιακοί αγώνες ‚olympischi Wettkämpf‘) isch d Sammelbezäichnig für Sportwettkampfveraastaltige, wo regelmäässig veraastaltet wärde: die „Olympische Spiil“ und die „Olympische Winterspiil“. Bi deene Spiil mässe sich Athlete und Mannschafte in verschiidene Sportarte. Si wärde vom Internationale Olympische Komitee (IOC) organisiert. D Zit zwüsche de Spiil wird als olymbiada ολυμπιάδα ‚Olympiade‘ bezäichnet aber in dr Umgangssprooch het sich dä Begriff für d Spiil sälber iibürgeret.
Am Ändi vom 19. Joorhundert het dr Pierre de Coubertin vorgschlaage, ass mä die Olympische Spiil wider wurd iifüere noch ere lange Zit wo die antike Festspiil z Olympia nüm abghalte worde si und 1894 het dr erst Olympisch Kongräss z Bariis beschlosse, 1896 z Athen Festspiil abzhalte as e „Dräffe vo dr Juuged vo dr Wält“, so dass sich d Völker besser wurde verstoo. Sit 1896 finde alli vier Joor (usser in de Zite vo de bäide Wältchrieg) Olympischi Spiil statt und sit 1924 au Olympische Winterspiil. Sit 1994 alterniere d Winter- und d Summerspiil im e zwäijöörige Rhythmus.
S IOC übernimmt au d Schirmherrschaft für d Paralympics as Wettkämpf vo behinderete Sportler, de Deaflympics, Special Olympics und vo de World Games für nitolympischi Sportarte. Drüber uuse git s sit 2010 die Olympische Juugedspiil, wo für Juugedligi im Alter vo 14 bis 18 bestimmt si.
Dr Umfang vo de Olympische Spiil isch immer gröösser worde, so dass hützudags so guet wie jedes Land uf dr Wält Sportler zu de Spiil schiggt. Näbe de Schutt-Wältmäisterschafte gälte si zur Zit as s grösste Sporteräignis uf dr Wält.
- ↑ Wilhelm Gemoll: Griechisch-Deutsches Schul- und Handwörterbuch, Münche/ Wien 1965