P-27 us Basel sin aini vo de erschte Rap-Gruppe us dr alemannische Schwytz. "Murder by Dialect" (1991) vo P27 isch s erschti Rap-Lied gsi mit Rym uf Schwytzerdütsch, und zwor vom Black Tiger. Das Lied isch uf em zwaite Fresh-Stuff-Säämpler usekoo. Im 1992 isch ihr Debü-Album "Overdose Funk" (Phonag) erschine. D Teggscht sin zum Dail uf Baseldytsch und zum Dail uf Änglisch gsi. Ihri zwaiti CD "Jetzt funkt's aa" (EMI) isch zway Joor schpöter usekoo, mit Teggscht uf Schwytzerdütsch, Änglisch und sogar Hochdütsch. 1999 hän si ihr dritts Album "Dr Einzig Wäg" (muve) usebrocht. Noch ere kleine Vrschnuufpause hän sy sich 2007 zruggmäldet mit dr EP "Pumpin' Daze". D Formation beschtooht zurzytt us em Skelt! (vocals) und em Tron (vocals, beats, scratches).