Dr Parthenon (altgriech. παρθενών „Jumferezimmer“) isch dr Tämpel für d Stadtgöttin Pallas Athena Parthenos uf dr Athener Akropolis und beherrscht sit 2500 Joor s Stadtbild vo Athen.
Mä het en noch em letschte Perserchrieg im dorische Peripterosstil baut, zum dr Göttin z danke, ass si d Athener und Grieche grettet het. Im Lauf vo dr Gschicht isch under anderem d Schatzchammere vom Attische Seebund im Pathenon dehäi gsi. Dr Parthenon isch äins vo de berüemtiste Baudänkmööler vom antike Griecheland, wo no existiere, und äins vo de bekanntiste Geböid uf dr ganze Wält.
Dr Parthenon het en eltere Tämpel vo dr Athena ersetzt, dr sogenannt Vorparthenon, wo wääred dr persische Eroberig vo Athen im Joor 480 v. d. Z. zerstöört worde isch. Im 6. Joorhundert het mä us em Tämpel e Chille gmacht, wo dr Jungfrau Maria gweiht gsi isch. Under de Osmane isch er as Moschee brucht worde, und im Chrieg gege Venedig het mä din Munizion glaageret. 1687 het e Chuugele d Minizion droffe, und si isch explodiert, was dr Tämpel stark beschädigt het. Däil vo sine Dekorazione het dr Lord Elgin 1801 abbaut und us em Land gschmugglet. Die sogenannte Elgin Marbles si hüte z London und d Grieche verlange ass si zrugggschiggt wärde.