Dr Perikles (altgriech. Περικλῆς * vor bzw. um 490 v. d. Z.[1]; † Septämber 429 v. d. Z.) het zu de füerende Staatsmänner vo Athen und dr griechische Antike im 5. Joorhundert v. d. Z. ghöört. In sinere Zit isch die Attischi Demokratii usbaut worde, d Vormachtstellig vo Athen im Attische Seebund gsterkt worde und e glanzvolls Baubrogramms uf dr Athener Akropolis usgfüert worde.
Er het langi Zit dr Boste vom Strateg ghaa, wo s wichdigste Waalamt in dr demokratisierte Gsellschaft vo Attika gsi isch. Er isch en usgezäichnete Redner gsi und het d Volksversammlig mäistens vo sine politische Blään chönne überzüüge. Er isch dorum wääsentlig mitverantwortlig für dr innergriechisch Machtkampf mit Sparta und däm sine Verbündete gsi, wo denn usbroche isch, und zum Peloponnesische Chrieg gfüert het. Mit dr Niiderlaag vo Athen in däm Chrieg het d Stadt iiri hegemoniali Stellig in Griecheland verloore.
- ↑ Dr Kagan z. B. datiert dr Draum vom Perikles sinere Mueter, si häig e Löi uf d Wält brocht (Herodot 6.131), wo si aagääblig e baar Dääg vor dr Geburt gha het, uf 494 v. d. Z. (Kagan, Perikles. Die Geburt der Demokratie, S. 27)