Popmuusig isch e Form vo Musik, wo vor allem sit 1955 us em Rock ’n’ Roll, dr Beatmuusig und em Folk entstande isch und vo Muusiggrubbe us em angloamerikanische Ruum wie de Beatles witergfüert und popularisiert worde isch. Si gältet sit de 1960er Joor as en internazional etablierti Wariante vo dr afroamerikanische Muusig, wo im Kontext vo jugendlige Subkulture entstande isch, ud elektroakustische Instrumänt gspiilt und über d Massemedia verbräitet wird. Im witere Sinn zelt jedi Art vo Underhaltigsmuusig, wo dur Massemedie verbräitet wird, wie Schlager, Filmmuusig, Operette, Miusikl, Danzmuusik, und populääri Adapzioone us E-Muusig, Folk und Dschääs zur Popmuusig. Dr Begriff im Sinn vo populärer Muusig z verwände, isch in dr Muusigwüsseschaft umstritte.[1]
Wäärend Popmuusig e Sammelbezäichnig isch für Muusigforme, wo ursprünglig us em Amerikanische stamme und uf e bsundrigi Art dur e Mischig vo Kulture kennzäichnet isch, bezäichnet populäri Muusig Underhaltigsmuusig, wo sit em Middelalter en integrierende Bestanddäil vo dr öiropäisch-oobeländische Muusigentwigglig daarstellt und „mit dr Ufkläärig am Ändi vom 18. Joorhundert und wo sich s bürgerlige Konzärtlääbe im erste Driddel vom 19. Joorhundert het afo entwiggle, en äigeständigs Lääbe het afo füere“.[2]
- ↑ Vgl. Peter Wicke «Populäre Musik» als theoretisches Konzept (Memento vom 23. Mai 2015 im Internet Archive) PopScriptum 1/92 - Begriffe und Konzepte, 6 - 42
- ↑ Österreichisches Musiklexikon, Kommission für Musikforschung, Verlag der Österreichischen Akademie der Wissenschaften Onläin (Memento vom 26. Oktober 2013 im Internet Archive)