_IMG_6763.jpg)
vo der Pro Natura Aargau a der Aare und der Limet
im «Wasserschloss vo der Schwiiz»
D Pro Natura isch en Organisazioon füre Naturschutz i der Schwiiz.
Es isch die eltischti Organisazioon, wo sech füre Naturschutz im Land tuet ysetze.
Anne 1909 isch der Verein als Schwiizerische Bund für Naturschutz SBN gründet worde. Es isch dozmol bsunders drum ggange, en Nazionalpark i der Schwiiz yzrichte. Das isch denn au glunge, und d Pro Natura hilft em Schwiizerische Nazionalpark im Bündnerland no hüt.
Der Verein luegt zu vilne Naturschutzpiet i de Kantöön, er macht das zäme mit andernen Organisazioone, de Kantönn und de Gmeinde. Är het zwöi Hüüser, wo über e Naturschutz informiere: s Pro Natura Zäntrum vo Champ-Pittet im Waadtland und s andere ob der Riederalp im Aletschgebiet im Wallis.
Der Verein, wo öppe 140'000 Mitgliider het, macht Akzioone und au politischi Kampagne für d Inträsse vom Naturschutz und vom Umwältschutz, er weert sech gäge übertribeni Chraftwärchprojäkt, er wott d Biodiversität verbessere, unberüerti Landschafte und s Kulturland erhalte, verändereti Gebiet wider naturnööcher gstalte so wie bi de früener emol kanalisierte Flusslöif, druf luege, ass d Ressource i der Natur nid z fescht Schade lyde, und d Möntsche drüber informiere, wie wichtig alles isch, wo mit der Natur z tue het.