D Psüchoanalüse (vo griechisch ψυχή psyche „Seel“ und ἀνάλυσις analysis „Zerlegig“, im Sinn vo „Undersuechig, Enträtselig vo dr Seel“) isch e psüchologischi Theorii, wo um 1890 vom Wiener Nöiroloog Sigmund Freud gründet worden isch. Us dr Psüchoanalüse uuse häi sich spööter die verschiidene Schuele vo dr Diefepsüchologii entwicklet.
Dr Begriff „Psüchoanalüse“ stoht für s Beschriibigs- und Erklärigsmodell vo dr menschlige Psüche, wo uf em Freud sine Theorie über d Psüchodünamik vom Unbewusste basiert, für die psüchoanalütische Therapie – e Grubbe vo Verfaare zur Behandlig vo innere und zwüschemenschlige Komflikt – und au für die psüchoanalütischi Methodik, wo sich au mit dr Undersuechig vo kulturelle Phenomen beschäftigt. In alle drei Aspäkt wird d Psüchoanalüse bis hüte vo Kliniker und Forscher witerentwicklet und veränderet; so isch die modärni Psüchoanalüse dur e theoretische, methodische und therapöitische Pluralismus charakterisiert.