D Regierig isch äini vo de mächdigste Instiduzioone im ene Staat. Si läitet, länkt und beufsichtigt d Politik gege inne und usse. E Regierig bestoot mäistens us eme Regierigsschef und meerere Minister, wo jede von ene en äignigs Ministerium het. Im ene bresidenzielle Süsteem wie zum Bischbil in de Veräinigte Staate isch s Staatsoberhaupt gliichzitig au dr Regierigsschef.
Vilmol isch d Bezäichnig Regierig e Sünonüüm für d Exekutive (die usfüerendi Gwalt) vom ene Staat oder eme politische Gebild, wo eme Staat äänlig isch. D Regierigsgwalt wird au as Gubernative bezäichnet.
In Bundesstaate git s Regierige uf verschidnige Eebene: uf dr Eebeni vom Bund und uf dere vo de Mitgliiderstaate wie de Kantöön in dr Schwiz oder de Länder in Dütschland.