| Dialäkt: Baseldütsch |
Dr Sarasinpark isch e Parkaalaag im Stil vom ene änglische Landschaftspark us dr Middi vom 19. Joorhundert mit ere Flechi vo öbbe 1'200 m² z Rieche im Kanton Basel-Stadt in dr Schwiz. Er lit nördlig vom alte Dorfkärn, diräkt wisawii vo dr Fondation Beyeler.
Ursprünglig isch s Areal landwirtschaftlig gnützt worde und es het druf e baar Buure- und Räbhüüser ghaa. An iirem Blatz si d Ökonomii- und Remisegböid vo de Landsitz baut worde, wo zum Däil no erhalte si. Dr Sarasinpark, wo 1766 entstande isch, veräinigt s Gländ vo drei barocke Landgüeter vo de Familie Werthemann-Stähelin, Le Grand und Elbs-Birr.
S Landguet vo de Elbs-Birr het dr Daniel Elbs-Birr in de Joor 1694/95 as Räbguet baut. Dr Samuel Heusler het s Geböid zum ene barocken Landsitz vergröösseret mit eme Cour d'honneur, wo s au bim Landguet vo de Iselin-Weber äine het. Us dr Barockzit isch e Lindenallee erhalte. Zitwiis isch s Landguet vo de Elbs-Birr im Bsitz vom Basler Stadtrootbresidänt Hieronymus Bischoff gsi, wo vo 1852 aa dr ersti Bresidänt vom Riechener Diakonissehuus gsi isch.
Im Beriich vom Iigang vom Haupthuus het d Dänkmolpflääg Deckimoolereie freigläit, wo under de spöötere barocke Stuckdeckene versteckt gsi si. S Geböid isch sit 1976 im Bsitz vo dr Iiwoonergmäind Rieche. Es isch saniert worde und isch hüte en öffentligi Muusigschuel.
In de früeje 1980er Joor isch dr Sarasinpark immer wider ins Gsprööch choo. Es isch vorgschlaage worde, druf e nöis Gmäindispiddaal oder e Schwümmbaad z baue, was aber bis hüte nid gmacht worde isch. Die ursprüngligi Grundstruktuur vom Park wird sit meerere Joor noo di noo wider häärgstellt. Under anderem wärde die gschwungene Wäägverlöif rekonstruiert, won emol vorhande gsi si und wo mä uf alte Blään vom Park guet cha gsee. En Orangscherii, wo dr domoolig Bsitzer vom Elbs-Birrsche Landguet im Joor 1836 baut het, isch restauriert worde und hüte wärde dört ghoobeni Aaläss abghalte. Grad unde draa lit e Weijer.
Au uf sim Zirkusblatz cha mä im Sarasinpark alli mööglige Aaläss organisiere. D Gmäind stellt dr Zirkusblatz bsundrigs sälle Organisatore zur Verfüegig, won e Beziejig zu Rieche häi. Im Inträssi vo de Noochbere basst mä uf, ass d Zaal vo de Aaläss nid über e verdrätbars Maass uusegoot.