Schaltjahr

Als Schaltjoor (latiin. annus bissextus) wird es Joor im Kalender bezeichnet, wo im Unterschiid zum Gmeinjoor en zuesätzliche Schalttag oder Schaltmonat hät.

E Kalender het historisch dr Zweck, dr Afang vu dr Johreszitte alljohr uf s'gliich Datum falle z'lo, um dr Zittpunkt zum Bispil vu Feste oder - bsunders fer d Landwirtschaft wichtige wiiderchehrende Ereignisse wie Rägezitt, Druchezitt, Ussaat oder Iberschwemmige bestimme z'chänne. E tropschis Johr, also dr Zittruum zwische zwei Früehligs-Dag-un-Nachtgliiche, durt allerdings ebba 365 Däg un e bitsili wäniger wie 6 Stunde (365d 5:48:45.98, nit konstant!), so dass e eifachi Zueornig, wo jedem Johr die gliich Azahl Däg git, umöglich isch, ohni dass sich gliichzittig dr Afang vu dr Johreszitte im Kalender verschiebt. In dr Sunnekalender vu dr verschidene Kulture git's deshalb Methode, um die jewilig Dur vum Johr im tropische Johr aznächere. In allene alde Kulture isch d Astronomi un demit au d'Festlegig vum Kalender in dr Regel ä Sach vu dr Priisterschaft gsi.

Dr Afang vu dr Johreszitte cha bispilswiis uf em gliiche Datum festghebt werre, wenn in geignete Abstände e Schaltjohr, e Johr mit eme zuesätzliche Dag, eme Schaltdag, igfüegt wird. E eifachi Methode isch, jedes virt Johr zum Schaltjohr z'mache. So isch es im Julianische Kalender igfüehrt worre, wo dr Februar 29 statt 28 Däg het. Gnaueri Kalender nächere s tropisch Johr besser a: Wil eweng wäniger wie sex Stunde pro Johr uszgliiche sin, fallt dr (Julianisch) Schaltdag menkmol us (wie z. B. anno 1900 im Gregorianische Kalender).

Amerkig: Der Kalender, wo hüt in fast alle Daile vu dr Welt (im insbsundere au in Dytschland, Österriich, Frankriich, Liechtestai un dr Schwyz) gilt, isch dr Gregorianisch Kalender.