| Dialäkt: Markgräflerisch (Ebringe) |
Dr Sinus Iridum (alemannisch: Rägebogebucht, deilwiis fälschlich au Iridium gschriibe) isch e Usbuchtig vum Mare Imbrium, also ere Diefebeni vu unserem Moo. Er befindet sich bi 44° 06' Nord un 31° 30' Wescht in dr Montes Jura (Jura-Gebirg) wo ihn vum Mare Frigoris (Chältimeer) trenne un wo dur dr Ischlag im Sinus Iridum entstande sin. Dr Durmesser betrait 236 km. Igrahmt wird er im Weste dur s' Promontorium Heraclides (Kap Heraclides) und im Oschte dur s' Promontorium Laplace (Kap Laplace).
Ufgrund vum fählede südliche Rand vum Ischlagskrater isch es zue Spekulatione chumme in wellere Reihefolgi bzw. in wellem Zämmehang säller mit em Mare Imbrium entstande isch. Ei These vum Nobelpriisträger un Chemiker Harold Clayton Urey in dr Middi vum 20. Johrhundert erchlärt die beide Strukture dodur, dass dr Sinus Iridum dr eigentlich Ischlagspunkt vum Asteroid gsi sei, säller aber im extrem schräge Winkel igschlage sei un dur e Explosion s'Mare Imbrium bildet häb.
Sälli These isch aber falsch. Dr Sinus Iridum isch nooch em Mare Imbrium entstande. Ime spätere Prozess sin aber beidi mit Basalte gfüllt worre. Dr fähled Südrand dürft aber igstürzt un aschliessed mit Basalte bedeckt worre si.
D'Benennig isch anno 1935 dur die IAU (Internationale Astronomische Union) erfolgt.
Im Fernglas isch dr Sinus Iridum bi wachsedem Mo as iber dr Terminator rusragede Boge z'erchänne, wenn säller grad dr öschtlich Rand vu dr Bucht erreicht het. Z'erscht luege d'Gipfel vum Juragebirg im Sunneliecht uf, no s'ganz Juragebirg, un schliesslich wanderet dr Terminator iber d'Bucht nyber.
|
Dä Artikel basiert uff ere fräie Übersetzig vum Artikel „Sinus_Iridum“ vu de dütsche Wikipedia. E Liste vu de Autore un Versione isch do z finde. |