| Slowakisch (slovenčina) | ||
|---|---|---|
| Verbreitig: | Slowakei, USA, Kanada, Serbie, Ungarn, Rumänie, Tschechie, Australie, Ukraine, Kroazie, Westöiropa | |
| Sprecher: | 6 Millioone | |
| Linguistischi Klassifikation: |
||
| Offizieller Status | ||
| Amtssprooch vo: |  Slowakei EU Serbie (Vojvodina)
| |
| Sproochchürzel | ||
| ISO 639-1 |
sk | |
| ISO 639-2 | (B) slo | (T) slk |
| ISO 639-3 | ||
Slowakisch (slowakisch slovenčina) wird vo öbbe fümf Millioone Slowake in dr Slowakei gschwätzt und vo öbbe zwäi Millioone Uswanderer, vo deene öbbe e Millioon in Nordamerika (USA, Kanada). Scho sit langer Zit lääbe Slowake au in Ungarn, Rumänie, Serbie und Tschechie. Noch 1945 und bsundrigs noch 1968 si e Hufe Slowake uf Nordamerika, Australie, Groossbritannie, Dütschland, Östriich, Frankriich und in d Schwiz usgwanderet. Sit em 1. Mai 2004, wo d Slowakei dr Öiropäische Union bidrätte isch, isch Slowakisch äini vo de EU-Amtssprooche.
Slowakisch ghöört – wie Tschechisch, Polnisch, Kaschubisch und Sorbisch – zu de westslawische Sprooche. D Slowake und d Tscheche verstöön enander relativ problemloos dank dr gmäinsame Gschicht und dr Nööchi vo de Sprooche, dr jüngere Generazioon, wo noch dr Drennig vo dr Slowakei und Tschechie sproochlig sozialisiert worde isch, fallt s aber dütlig schwerer. Drotzdäm wärde au hüte no offizielli Dokumänt in dr jewiilige Sprooch geegesitig zwüsche Tschechie und dr Slowakei automatisch anerkennt und s Rächt, im Amtsvercheer die anderi Sprooch z bruuche, isch explizit gsetzlig verankeret (Minderhäitesproochegsetz 184/1999 Zb. in dr Slowakei und Verwaltigornigsgsetz 500/2004 Sb. z Tschechie). Brogramm im Färnsee in dr jewiils andere Sprooch wärde in dr Slowakei fast immer und z Tschechien vilmol ooni Übersetzig gsändet.
Slowakisch gältet as s Esperanto vo de slawische Sprooche und Sprächer vo andere slawische Sprooche gseen s as die verständligsti slawischi Sprooch.[1][2]
- ↑ Über die Sprache slovake.eu, abgrüeft 12. April 2012.
- ↑ Über die Slowakische Sprache. abgrüeft 12. April 2012.