Dr Begriff soziali Grubbe bezäichnet in dr Soziologii und Psüchologii e Sammlig vo mindestens zwei Persone.[1] Soziologisch definiert sich e Grubbe drmit, ass alli iiri Mitgliider en ummiddelbari soziali Beziejig zunenander häi. Jeedes Mitgliid kennt die andere Mitgliider und zwüschen alle Mitgliider si soziali Interakzioone mööglig. Wääge de Interakzioone wo nöötig si, isch d Gröössi von ere Grubbe also grundsätzlig begränzt.
Daas isch dr Underschiid zwüschen ere soziale Grubbe und ere Organisazioon. Organisazioone chönne im Vergliich zun ere Grubbe seer vil Mitgliider haa und iiri Sozialstruktur cha seer komplex si, zum Bischbil chönne si en anonüümi Struktur mit formalisierte, anonüüme Begeegnige haa. Gläägentlig wärde si dorum as formelli Grubbe bezäichnet.
In dr Psüchologii, bsundrigs dr Sozialpsüchologii, wird d Gröössi von ere Grubbe nit begränzt; es git Wüsseschaftler, wo aber zwüsche Fenomeen in chliinere Grubbe und sonige in gröössere en Underschiid mache. Äi Definizion, wo vo vile anerkennt wird, stammt vom Sozialpsücholoog Henri Tajfel, won e (soziali) Grubbe as e Sammlig vo Indiwidue definiert het:[2]
- wo sich sälber as Mitgliider vo dr gliiche soziale Kategorii gseen,
- wo im ene gwüsse Maass emotional bunde si an die Kategorii,
- wo meer oder weniger gmäinsam iiverstande si, was iiri Mitgliidschaft bedütet und wie si d Grubbe iischetze.
Im Tajfel si Theorii wird bi chliine Grubbe wie au bi ethnische Grubbe und ganze Nazioone aagwändet.