Stoa

As Stoa (altgriech. Στοά) wird e filosofischi Schuel bezäichnet, wo groosse Iifluss uf d Kultur vom Oobeland gha het. Dr Naame (griechisch στοὰ ποικίλη – „aagmoolti Vorhalle“) goot uf e Süülehalle uf dr Agora, em Määrtblatz vo Athen, zrugg, wo dr Zenon vo Kition um 300 v. d. Z. Underricht gee het.

E bsundrigs Merkmol vo dr stoische Filosofii isch iiri kosmologischi Betrachtigswiis, wo d Wält as Ganzes will erfasse. Es git e universells Brinzip, wo in alle natürlige Fenomeen und Zämmehäng zum Usdruck chunnt. Dr Stoiker as Individuum muess si Blatz in deere Ornig finde und iinee. Für das muess er emozionali Sälbstbeherrschig entwiggle und sis Schiggsaal akzeptiere und mit Hilf vo Glassehäit und Seelerue d Wiishäit aasträäbe.