Vilzäller oder Meerzäller (Metabionta) si Lääbewääse, wo us meerere oder vile Zälle ufbaut si. Ächti Meer- und Vilzäller underschäide sich vo Kolonie vo äizällige Lääbewääse wil dr Zällverband e gmäinsame Stoffwäggsel het, d Zälle e mee oder weniger usbrägti Ufgoobedäilig häi und sich vilmol Gwääb usbilde. D Gränze zwüsche Meerzäller und Vilzäller isch nit genau definiert.
Meerzälligi Lääbewääse umfasse die mäiste Dier (Animalia), Pflanze (Plantae) und Bilz (Fungi). Bi Alge im ängere Sinn und bi Bakterie (Bacteria) git s Übergangsforme zur Meerzälligkäit.