D Wikinger (au Nordmänner, Waräger odr Rus gnännt) si kei gschlosseni, ethnischi Gruppe gsi, sondern händ i verschidene Stämm und Völcher zerscht als Buure z Skandinavie gläbt.
Als d Wikingerzit wird meistens di Zyt zwüsched 517 und 1066 agluegt, wo d Wikinger immer wider Küste-, Flussgebiet und Insle z Europa plünderet, aber teilwiis i dene Länder au Dörfer gründet und es wiits Handelsnetz errichtet händ. D Wikingerschiff sind gfüchtet gsi, will si schnäll cho sind und me immer mid emene Agriff het müesse rächne.
Hüt goot me dervo uss, dass d Wikinger wäge widrige Läbensumständ ihri Heimat verlooh händ, zum im riiche und klimatische agnähemere Mitteleuropa go z woone. So hai si sich z Nordfrankriich niiderglo un ere Region ihre Name gä: Normandie. Z Ängland hai si Gebiet im Oschde eroberet, d Königriich Northumbria und East Anglia und d Gebiet vo de Stedt Leicester, Nottingham, Derby, Stamford und Lincoln. Dr Region, wo si gherrscht hai, sait mä Dane Law, das heisst s Gebiet vo de Gsetz vo de Däne, wobii mit Däne alli Skandinavier gmeint si.
D Wikinger si aber au in Oschde gfaare und noch Russland greist für zum Handel driibe. Uf de russische Flüss sind si südwärts gsäglet und bis zum Schwarze und em Kaspische Meer cho.[1] Si hai z Novgorod es Königriich gründet.[2] Im Weschde hai si vili vo de Insle im Atlantik enddeggt und deilwiis au besiidlet, Island vo öbbe 870 a) und Grönland vom Johr 984 aa bis ins 15. Johrhundert. D Landnaam vo Island isch vor alem dur Norweger erfolgt, wo sich gege d Königsmacht vom Harald Schööhoor und sinene Nochkome gwehrt hend. Dr Leif Erikson isch öbbe um s Johr 1000 uf em nordamerikanische Feschdland acho,[3] und mä het Überräschd von erä Wikingersiidlig z Neufundland entdekt.[4]
Es wird überlieferet, d Wikinger sige wildi Lüüt gsi, wo vil Fleisch gässe und unpflägti Bärt gha heige und Länder überfalle und uspländeret heige. Me dänkt hüt aber, d Wikinger heige gar ned so gern Fleisch gha. Si heige Pökelfleisch gmacht und vill lieber Fisch und bi Fescht sogar au Gmües gha. Warschinlich hend si gärn Zwyble und ned immer nur im Salz tröchnets Pöckelfleisch ggesse.
D Wikinger si keis einheitlechs Volk gsi. Als Wikinger werdet Mensche bezeichnet, wo im allgemeine us Skandinavie cho si und wo sich zum handle, för de Chrieg und d Seefahrt uf Schiff zemmä ta hend und gmeinsam unterwegs gsi sind.