| Dialäkt: Baseldütsch |
Dr Wolfgottesacker isch e Friidhoof z Baasel. Er lit im Oste vo dr Stadt uf stedtischem Gebiet näbe de Gläis vo dr SBB und bildet e grüeni Insle im Industrii- und Gwärbgebiet zwüschen em Rangschierbaanhoof «Wolf» und em Dramdepo «Dreispitz».
Dr Wolfgottesacker isch, abgsee vom Dalbe-Kiirchhoof, wo nume chliini Däil von em erhalte si, dr eltist Baasler Friidhof, wo zum grösste Däil no erhalte isch, und wird, im Geegesatz zu alle andere historische Friidhööf au hüte no benützt. Er isch äins vo de bedütendste Schwizer Bischbil für früeji Friidhööf, wo landschaftlig gstaltet si. Dorum stoot er uf dr Liste vo de Kulturgüeter in dr Stadt Baasel, wo nazionali Bedütig häi.