As Zit vom Nazionalsozialismus (abkürzt NS-Zit) wird d Regierigszit vo dr Nazionalsozialistische Dütsche Arbäiterbartei (NSDAP) im Dütsche Riich bezäichnet. Si het am 30. Januar 1933 mit dr Ernennig vom Adolf Hitler zum Riichskanzler aagfange und isch am 8. Mai 1945 mit dr bedingigsloose Kapitulazioon vo dr Weermacht vor de Alliierte und iire Verbündete ume gsi.
D Nazionalsozialiste häi in dere Zit z Dütschland e Diktatur noch em Füererbrinzip iigrichdet und mit em Überfall uf Pole am 1. Septämber 1939 dr Zwäit Wältchrieg aagfange.
Näbe dr Verfolgig und Ermordig vo Lüt, wo politisch anders dänkt häi, häi si e hufe anderi Verbräche gege d Menschligkäit gegenüber ethnische, religiööse und andere Minderhäite begange. Öbbe säggs Millione öiropäischi Juude si im Holocaust, wo historisch bischbillos isch, ermordet worde, bis zu 500'000 Sinti und Roma si im Porajmos umchoo und öbbe 100'000 Mensche mit gäistige und körperlige Behindrige im Raame vo dr „Aktion T4“ und dr „Aktion Brandt“. Noch dr Strategii vom sogenannte Hungerblaan häi die dütsche Bsatzer in dr Sowjetunion zwüsche 1941 und 1944 gschätzti 4,2 Millione Mensche bewusst lo verhungere und öbbe 3,1 Millione sowjetischi Soldate si in dütscher Chriegsgfangeschaft gstorbe.
D Era vo dr nazionalsozialistische Herschaft z Dütschland und über witi Däil vo Öiropa wird im ene ethisch-moralische Sinn as Zivilisazioonsbruch aagluegt und as Diefpunkt bsundrigs vo dr dütsche, aber auch der öiropäische Gschicht im Ganze.[1]
- ↑ Vgl. Christa Berg (Hrsg.): Handbuch der deutschen Bildungsgeschichte. Band 6: 1945 bis zur Gegenwart. Beck, Münche 1998, ISBN 3-406-32467-3, S. 1.