Compilador

Un compilador ye un programa d'ordenador que traduz un conxuntu d'instrucciones escrites nun llinguaxe de programación (el códigu fonte) nun conxuntu d'instrucciones n'otru llinguaxe diferente (el códigu oxetu)

De cutio fálase de compilador cuando'l códigu fonte ta escritu nun llinguaxe d'altu nivel (qu'una persona pue caltriar), y el códigu oxetu ye códigu especialmente pensáu pa que lu emplegue la máquina (l'ordenador) que va executar les instrucciones (por exemplu, ye típicu que'l códigu oxetu quede nun ficheru COM o EXE que pue executase direutamente).

Hai programes que traducen instrucciones d'un llinguaxe d'altu nivel a otru, pero entós ye más correutu nomar a esos programes traductores y non compiladores. Tamién hai programes que traducen d'un llinguaxe de baxu nivel a ún d'altu nivel; llámense descompiladores (esti procesu nun se pue facer siempre).

Na práutica, un compilador pue vese como una ferramienta qu'empleguen los programadores pa xenerar un programa; ellos escriben nun llinguaxe d'altu nivel, y col compilador xeneren el programa executable que-y dan al veceru, y qu'ésti pue emplegar na xera que correspuenda.