Los disturbios de Stonewall consistieron nuna serie de manifestaciones bonales y violentes en protesta contra una redada policial que tuvo llugar na madrugada del 28 de xunu de 1969, nel pub conocíu como Stonewall Inn, allugáu nel barriu neoyorquín de Greenwich Village. Frecuentemente cítense estos disturbios como la primer ocasión, na hestoria d'Estaos Xuníos, en que la comunidá LGBT lluchó contra un sistema qu'escorría a los homosexuales col beneplácito del gobiernu, y son xeneralmente reconocíos como'l catalizador del movimientu modernu pro-derechos LGBT n'Estaos Xuníos y en tol mundu.[1]
Mientres les décades de 1950 y 1960 los gais y lesbianes estauxunidenses teníen d'enfrentase a un sistema llegal muncho más contrariu colos homosexuales qu'en munchos de los países al este del telón d'aceru.[2][nota 1] Los primeres grupos homófilos de EE. XX. intentaron demostrar que les persones homosexuales yeren parte de la sociedá, y fomentaron una cultura de non confrontación ente homosexuales y heterosexuales. Sicasí, los últimos años de la década de 1960 fueron bien aturbolinaos, yá que había munchos movimientos sociales activos, tales como'l movimientu afroamericanu polos derechos civiles, la contracultura de los 60, el movimientu hippie y les manifestaciones contra la guerra de Vietnam. Esti clima batallosu, xunto al ambiente lliberal de Greenwich Village, influyó por que se produxeren los disturbios de Stonewall.
Yeren pocos los establecimientos qu'acoyíen a persones abiertamente homosexuales mientres les décades de 1950 y 1960. Los que sí lo faíen yeren xeneralmente chigres, anque los sos propietarios y alministradores raramente yeren gais. El Stonewall Inn, naquella dómina, yera propiedá de la mafia.[3][4] Sirvía a gran variedá de veceros, pero yera conocíu por ser popular ente les persones más marxinaes de la comunidá gai: transexuales, drag queens, nuevos amuyeraos, prostitutos masculinos y nuevos ensin techu. Les redaes policiales nos chigres gais yeren daqué rutinariu mientres la década de los 60, pero los axentes de policía perdieron de secute el control de la situación nel Stonewall Inn y atraxeron a un ensame, provocando que se remontaren. La tensión ente la policía de Nueva York y los residentes gais de Greenwich Village produció más protestes la siguiente tarde, y socesivamente delles nueches dempués. En cuestión de selmanes, los residentes del Village rápido entamáronse en grupos d'activistes pa concentrar esfuercios n'ares d'establecer llugares por que gais y lesbianes pudieren manifestar abiertamente la so orientación sexual ensin mieu a ser arrestaos.
Tres los disturbios de Stonewall, los gais y lesbianes de Nueva York fixeron frente a torgues de índole xeneracional, de clase y de xéneru pa formar una comunidá cohesionada. A los seis meses creárense dos organizaciones d'activistes gais en Nueva York, con oxetu de realizar protestes de confrontación, y amás fundáronse trés periódicos pa promover los derechos pa gais y lesbianes. En pocos años fundáronse organizaciones de derechos homosexuales a lo llargo de too Estaos Xuníos y a nivel internacional. El 28 de xunu de 1970 tuvieron llugar les primeres coles del arguyu gai nes ciudaes de Nueva York y Los Angeles, conmemorando l'aniversariu de los disturbios. Col tiempu, otres ciudaes fueron entamando marches similares. Anguaño celébrense manifestaciones del arguyu añalmente per tol mundu escontra finales de xunu, pa recordar los disturbios de Stonewall.[5]
<ref> nun ye válida; nun se conseñó testu pa les referencies nomaes memory
Error de cita: Esisten etiquetes <ref> pa un grupu llamáu "nota", pero nun s'alcontró la etiqueta <references group="nota"/> correspondiente