.svg)
Namibia, oficialmente República de Namibia, ye un país allugáu nel suroeste d'África, na costa del Océanu Atlánticu. Tien llendes con Angola y Zambia pel norte, con Botsuana pel este y cola República Sudafricana pel sur. Magar que nun comparte frontera con Zimbabue, dambos países tán separtaos namái por menos de 200 m del cursu del ríu Zambeze. Namibia algamó la independencia de Sudáfrica'l 21 de marzu de 1990, tres de la guerra d'independencia namibia. La so capital, y ciudá mayor, ye Windhoek. Namibia ye un país miembru de les Naciones Xuníes, la Comunidá de Desenvolvimientu d'África Austral, la Xunión Africana y la Mancomunidá de Naciones.
Namibia, el más secu de los países del África subsaḥariana, lleva miles d'años siendo habitada por xentes de los pueblos san, damara y nama. Alredor del sieglu XIV, dientru del procesu d'espansión de los bantús, aportaron a la rexón xentes d'esta etnia. De magar los grupos bantús, ente los cuales el mayor ye'l de los ovambo, tienen dominao la población del país, y son mayoría nella dende finales del sieglu XIX.
En 1878 la Colonia del Cabu, daquella una colonia británica, anexonóse'l puertu de Walvis Bay y les islles Pingüín, que pasaron a formar parte integral de la nueva Xunión Sudafricana cuando foi creada en 1910. En 1884 l'Imperiu alemán pasó a controlar la mayoría del territoriu actualmente namibiu, col que formó la colonia conocida como África del Suroeste Alemana. Los alemanes, que desarrollaron l'agricultura y les infraestructures de la rexón, perpetraron un xenocidiu escontra la población herero y nama ente 1904 y 1908. El dominiu alemán finó en 1915, cuando foron derrotaos polos soldaos sudafricanos. En 1920, tres del fin de la Primer Guerra Mundial, la Lliga de Naciones encomendó-y l'alministración de la colonia a Sudáfrica. Esta impuso les sos lleis, incluyies la so clasificación racial y les sos normes raciales. De magar 1948, col Partíu Nacional nel poder, la politica del apartheid foi impuesta nesti territoriu que recibía d'aquella'l nome d'África del Suroeste.
Según avanzaba'l sieglu XX, les demandes crecientes de representación política de los activistes políticos del país, que pidíen la independencia, dieron como resultáu la asunción poles Naciones Xuníes de l'alministración directa del territoriu en 1966, pese a lo que Sudáfrica siguió calteniendo'l so control de facto. En 1973 la ONX reconoció a la Organización del Pueblu d'África del Suroeste (South West Africa People's Organisation, SWAPO) como representante oficial del pueblu namibiu. Esta organización, dominada polos ovambo, la etnia dominante en númberu nel país, siguió cola so guerra de guerrilles. Sudáfrica estableció una alministración interina nel país en 1985, y concedió-y la independencia al país en 1990. Sicasí, Walvis Bay y les islles Penguin siguieron controlaes por Sudáfrica hasta 1994.
Namibia tien una población de 2,55 millones d'habitantes, que se gobiernen al traviés d'un sistema democráticu parllamentariu multipartidista. Agricultura, turismu y minería, de diamantes, uraniu, oru, plata y metales básicos, son la base de la economía del país, que tien un sector industrial poco desarrolláu. El desiertu del Namib, perestensu y peráridu, ocupa la mayor parte del territoriu d'esti país al que-y da nome, que ye ún de los de menor densidá de población del mundu.
- ↑ URL de la referencia: https://thecommonwealth.org/our-member-countries/namibia. Data de consulta: 21 ochobre 2022. Tipo de referencia: official member page.
- ↑ URL de la referencia: https://www.wto.org/english/thewto_e/countries_e/namibia_e.htm. Data de consulta: 25 setiembre 2024.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://public.wmo.int/en/members/namibia. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 6. Supports qualifier: data de principiu.