Rembrandt Harmenszoon van Rijn (15 de xunetu de 1606, Leiden – 4 d'ochobre de 1669, Ámsterdam) foi un pintor y grabador neerlandés. Ta consideráu como unu de los más grandes pintores y grabadores de la historia del arte européu y el más importante de la historia neerlandesa. [8] Les sos contribuciones al arte formó parte d'un periodu que los historiadores llamen Edá d'Oru Neerlandesa.
En trunfando como pintor de retratos mozu, los sos últimos años tuvieron marcaos pola traxedia personal y dificultaes financieres. Sincasí, los sos dibuxos y pintures fueron populares a lo llargo de la so vida, y la so reputación como artista sigue siendo elevada, [9] y a lo llargo de venti años foi maestru de cásique tolos pintores neerlandeses más importantes. [10] Les sos obres más representatives son retratos de los sos contemporáneos, autorretratos ya ilustraciones de les escenes de la Biblia. Los sos autorretratos formen una única ya íntima biografía, na que'l propiu artista fai una introspección ensin vanidá y cola sinceridá más grande.
Nes pintures y los grabaos amuesa una conocencia completa de la iconografía clásica, que moldea p'adaptase a les esixencies de la so propia esperiencia; poro, na representación d'una escena bíblica, Rembrandt tenía un bon conocimientu del testu específicu, l'asimilación de la composición clásica, y les sos observaciones de la población xudía d'Ámsterdam. [11] Por mor de la so empatía pola condición humana, que foi nomáu "unu de los grandes profetas de la civilización." [12]
Les dos etapes de la vida de Rembrandt (la próspera y l'adversa) espéyense nes sos obres, y mui especialmente nos autorretratos. Mientres que los primeros son alegres y brillantes, los de los últimos años tienen un calter muncho más serenu y escuru, con una fondura superior. Toles sos obres son barroques dafechu, y tán dominaes pola aición, el dramatismu y un realismu deriváu de la observación del mundu que l'arrodiaba.
- ↑ URL de la referencia: http://www.bbc.co.uk/news/uk-scotland-13682474.
- ↑ 2,0 2,1 Afirmao en: Gemeinsame Normdatei. Data de consulta: 9 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ Afirmao en: Gemeinsame Normdatei. Data de consulta: 30 avientu 2014. Llingua de la obra o nome: alemán. Autor: Biblioteca Nacional d'Alemaña.
- ↑ 4,0 4,1 4,2 Afirmao en: ECARTICO. Identificador ECARTICO de persona: 6292. Data de consulta: 3 agostu 2023. Llingua de la obra o nome: inglés.
- ↑ Afirmao en: CONOR.SI. Identificador CONOR.SI: 7651171.
- ↑ URL de la referencia: https://www.mauritshuis.nl/en/discover/exhibitions/rembrandt-and-the-mauritshuis/.
- ↑ Afirmao en: ECARTICO. Identificador ECARTICO de persona: 6292. Data de consulta: 23 payares 2023. Llingua de la obra o nome: inglés.
- ↑ Gombrich, páx. 420.
- ↑ Gombrich, páx. 427.
- ↑ Clark, p. 203.
- ↑ Clark, p. 203-4.
- ↑ Clark, p. 205.